Jos 14 | NdeIBE | STEP | Lezi yizo izindawo abako-Israyeli abazamukela njengelifa elizweni leKhenani, lezo u-Eliyazari umphristi, uJoshuwa indodana kaNuni lezinhloko zezizwana zako-Israyeli abazabela zona.

Joshua 14

Ukwabiwa komhlaba eNtshonalanga yeJodani

1 Lezi yizo izindawo abako-Israyeli abazamukela njengelifa elizweni leKhenani, lezo u-Eliyazari umphristi, uJoshuwa indodana kaNuni lezinhloko zezizwana zako-Israyeli abazabela zona. 2 Ilifa labo labiwa ngokwenza inkatho ezizwaneni eziyisificamunwemunye lengxenye, njengokulaya kukaJehova ngoMosi.

3 UMosi wayenike izizwe ezimbili lengxenye ilifa lazo empumalanga yeJodani, kodwa wayengabelanga abaLevi ilifa phakathi kwazo,

4 ngoba amadodana kaJosefa ayeyizizwana ezimbili – esikaManase lesika-Efrayimi. AbaLevi kabazuzanga sabelo ngaphandle kwamadolobho okuhlala lamadlelo emihlambi yezimvu leyezinkomo. 5 Ngakho abako-Israyeli behlukanisa umhlaba, njengoba uJehova wayelaye uMosi.

IHebhroni inikwa uKhalebi

6 Amadoda akoJuda aya kuJoshuwa eGiligali, uKhalebi indodana kaJefune umKhenizi wathi kuye, “Uyakwazi ukuthi uJehova wathini kuMosi umuntu kaNkulunkulu eKhadeshi Bhaneya mayelana lawe lami.

7 Ngangileminyaka engamatshumi amane lapho uMosi inceku kaJehova yangithuma ngisuka eKhadeshi Bhaneya ukuyahlola ilizwe. Ngaletha kuye umbiko owawuphathelane lemibono yami,

8 kodwa abazalwane engahamba labo benza ukuthi izinhliziyo zabantu zithuthumele ngokwesaba. Mina, lanxa kunjalo, ngalandela uJehova uNkulunkulu wami ngenhliziyo yami yonke. 9 Ngakho ngalelolanga uMosi wafunga kimi wathi, ‘Umhlabathi lowo onyathelwe yizinyawo zakho uzakuba yilifa lakho labantwabakho kuze kube nini lanini, ngenxa yokuthi ulandele uJehova uNkulunkulu wami ngenhliziyo yakho yonke.’

10 “Ngakhoke, njengoba uJehova wayethembisile, usengigcine ngiphila okweminyaka engamatshumi amane lanhlanu kusukela ngezikhathi lapho akhuluma lokhu kuMosi, u-Israyeli esazulazula enkangala. Ngakho nanku sengilapha lamhla, sengileminyaka yokuzalwa engamatshumi ayisificamibili lanhlanu! 11 Lokhu ngisaqinile lamhla njengelanga uMosi angithuma ngalo; lokhu ngisaqinile ukuyakulwa impi khathesi okufanana lalokho engangiyikho khona ngaleso sikhathi. 12 Ngakho nginika leli ilizwe lamaqaqa engalithenjiswa nguJehova ngalelo langa. Wena ngokwakho wezwa ngaleso sikhathi ukuthi ama-Anakhi ayekhona lapho njalo amadolobho awo ayemakhulu ehonqolozelwe, kodwa ngokuncediswa nguJehova, ngizawaxotsha njengokutsho kwakhe.”

13 Ngakho UJoshuwa wabusisa uKhalebi indodana kaJefune wamnika iHebhroni yaba yilifa lakhe. 14 Ngakho iHebhroni isibe ngekaKhalebi indodana kaJefune umKhenizi kusukela ngaleso sikhathi, ngenxa yokuthi walandela uJehova, uNkulunkulu ka-Israyeli ngenhliziyo yakhe yonke. 15 (IHebhroni yayithiwa yiKhiriyathi Abha ibizwa ngo-Abhe owayeyindoda eyayiyisikhulu esesabekayo phakathi kwama-Anakhi). Ngakho ilizwe laba lokuphumula ekulweni izimpi.